नेकपाको स्थायी समिति बैठक आज बस्दै,अध्यक्ष ओली पनि सहभागी हुने
काठमाडौँ— प्रधानमन्त्री एवं पार्टीका अध्यक्ष केपी शर्मा ओलीको स्वास्थ्यवस्थालाई ध्यानमा राखेर नेकपाले स्थायी कमिटी बैठक बालुवाटारमा नै सारेको छ ।
Advertisement
धुम्बाराहीमा दिउँसो १ बजे बस्ने भनिएको बैठक बालुवाटारमा सारिएको नेकपा महासचिव विष्णु पौडेलले जानकारी दिए ।
पार्टीभित्र अल्पमतमा परेका नेकपाका प्रथम अध्यक्ष एवं प्रधानमन्त्री केपी शर्मा ओली एजेण्डामा सहमति जुटेपछि आजको बैठकमा सहभागी हुने उनी निकट नेताहरूले बताएका छन् । सहमति नजुट्दा ओली मंसिर २१ को स्थायी कमिटी बैठकमा सहभागी भएका थिएनन् ।
ओलीबिनै बसेको मंसिर २१ को बैठक एक साताका लागि स्थगित भएको थियो । कार्यकारी अध्यक्ष पुष्पकमल दाहाल ‘प्रचण्ड’ ले एकलौटीरूपमा राजनीतिक प्रस्ताव लगेपछि पार्टीमा अप्ठ्यारोमा परेका ओलीले योबीचमा गरेका सहमतिका प्रयास असफल भएका छन् ।
खासगरी प्रधानमन्त्री ओली अर्का अध्यक्ष प्रचण्डले ल्याएको प्रतिवेदन फिर्ता गर्नुपर्ने पक्षमा छन् भने प्रचण्ड दुवै प्रतिवदनमाथि छलफल गरेर निश्कर्षमा पुग्नुपर्ने भन्दै प्रस्ताव फिर्ता नगर्ने अडानमा छन् ।
यो बीचमा केही नेताहरुले नेकपाको विवाद समाधान गर्न दुवै अध्यक्षका प्रतिवेदन स्थगित गरेर अर्कै प्रतिवदन बनाउन सकिने भन्दै नेताहरुलाई कन्भिन्स गर्न खोजेपनि त्यसमा प्रचण्ड सहमत हुन सकेका छैनन ।
गत २४ मंसिरमा ओली र प्रचण्डबीच भएको भेटमा सहकार्यका लागि प्रधानमन्त्री ओलीले राखेको प्रस्ताव प्रचण्डले अस्वीकार गरेका थिए । त्यसयता उनीहरूबीच संवादसमेत भएको छैन ।
प्रचण्डले कमिटीबाहिर हुने छलफल र संवादको औचित्य नभएको बताउँदै आएका छन् ।
४५ सदस्यीय नेकपाको स्थायी कमिटीमा अहिले ४३ सदस्य छन् । सभामुख अग्नी सापकोटा र पूर्वसभामुख कृष्णबहादुर महराको पद रिक्त छ । स्थायी कमिटीमा प्रचण्ड–नेपाल समूह बहुमतमा छ ।
दुवै अध्यक्षको प्रतिवेदनलाई औपचारिक छलफलको विषय बनाउन नहुने ओली पक्ष देखिएपछि प्रचण्ड–नेपाल समूहले भने दुवै प्रतिवेदनलाई अल्पमत र बहुमतकै विधिबाट छिनोफानो गरेर केन्द्रीय कमिटीसम्म छलफलमा लैजाने गरी तयारी गरेको छ ।
प्रतिकृया दिनुहोस्