च्याउको बीउ बेचेरै महिनाको एक लाख कमाउने युवा

सर्लाही । सर्लाहीका एक युवकले च्याउको बीउ बेचेर मनग्य आम्दानी गरिरहेका छन् । वैदेशिक रोजगारीबाट फर्किका वागमती नगरपालिका– १० का ध्रुवप्रसाद चौलागाईं च्याउको बीउ बेचेर मनग्य आम्दानी गर्न सफल भएका हुन् ।

Advertisement

पाँचपटक वैदेशिक रोजगारीमा गएर फर्किएका शङ्करपुरका चौलागाईंले कन्ने च्याउको बीउ बिक्रीबाट सम्पूर्ण खर्च कटाएर मासिक एक लाख आम्दानी गर्दै आएको जानकारी दिए ।

तीन वर्षदेखि व्यावसायिक च्याउखेती गर्दै आएका उनले गत वर्षदेखि बीउ उत्पादन गर्न शुरु गरेका हुन् । दुई सय ५० ग्रामको दैनिक एक हजार प्याकेट बीउ उत्पादन गरिरहेको उनले बताए ।

यसअघि बीउ लिन हेटौँडा, काठमाडौँ लगायतका ठूला शहरमा धाउनुपर्ने भएपनि अहिले त्यो समस्या समाधान भएको उनको भनाइ छ । अहिले वाग्मतीको शङ्करपुरमै बीउ उत्पादन भएपछि यस क्षेत्रका व्यावसायिक च्याउखेती गर्ने किसानलाई सजिलो भएको छ ।

उनले करीब ५० लाखमा बीउ उत्पादन गर्ने उपकरण खरीद गरेका थिए । स्थानीय बजारमा च्याउको माग अत्यधिक रहेकाले च्याउ र बीउ बिक्री गर्न बजारको समस्या नभएको उनले बताए ।

उनले प्रतिप्याकेट ४० रुपैयाँमा स्थानीय किसान, सिन्धुली, रौतहट, महोत्तरीका किसान र कृषि ज्ञान केन्द्र सर्लाहीलगायत देशका विभिन्न ठाउँमा बीउ बिक्री गरिरहेका छन् । च्याउखेती र बीउ उत्पादन गर्न उनलाई पारिवारबाट पनि राम्रो सहयोग रहेको छ ।

उनले च्याउको बीउ उत्पादन गर्ने काममा तीन जनालाई रोजगारी दिएका छन् । यही व्यवसायको कमाइबाट चार कट्ठा जग्गा खरीद गरेको समेत उनले बताए ।

उनले ध्रुव कृषि फार्म दर्ता गरेर व्यावसायिकरुपमा च्याउको बीउ तथा च्याउ नै उत्पादन गरी बिक्रीवितरण शुरु गरेका हुन् । स्वदेशमै केही गरौँ भनेर २०७४ सालदेखि व्यावसायिक च्याउखेती शुरु गरेका उनले अहिले एक हजार ५०० पोका राख्नसक्ने क्षमताको टनेल र घरको तल्लो तलामा एक हजार पोका च्याउखेती गरिरहेका छन् ।

च्याउखेती विशेषतः जाडो मौसममा हुने गर्छ । बेमौसमी च्याउखेतीका लागि घरको दुई वटा कोठालाई चिसो बनाइराख्न उनले वातानुकूलन उपकरण समेत जडान गरेका छन् ।