बीबीए पास गरेका युवक भैंसी पालेर मासिक १ लाखभन्दा बढी कमाउँदै

सर्लाहीका एक युवकले भैँसीपालनबाट मनग्य आम्दानी गर्दै आएका छन् । ब्याचलर पास गरेका रवीन्द्र यादवले जागिर खान छाडेर गाउँमै बसेर बाबुबाजेले गर्दै आएको पशुपालन पेशालाई अगाडि बढाए । कविलासी नगरपालिका– १०, सलेमपुरका यादवले गाउँमै कृषि फार्म खोलेर भैँसीपालनबाट मनग्य आम्दानी गर्दै आएका छन् ।

Advertisement

बाबुबाजेले गर्दै आएको कृषि पेशालाई नै अगाडि बढाउनुपर्छ भन्ने सोच लिएर बीबीएको पढाइ सकेर आफु गाउँ फर्किएको उनले बताए । बैंकबाट २५ लाख ऋण लिई करीब एक वर्ष अघि हिम अमृत कृषि फार्म दर्ता गराई भैंसीपालन व्यवसाय शुरु गरेको उनले बताए ।

उनको कृषि फार्ममा अहिले ५० भैँसी, तीन राँगा, २५ वटा पाडापाडी र दुई गाई रहेका छन् । पच्चीस दुधालु भैँसी उनले फार्म मै राखेका छन् भने दूध दिन छाडेका २५ भैँसी गाउँकै स्थानीय किसानलाई पाल्न दिएको यादवले बताए । आफूले फार्ममा पालेका सबै पशुको पशु बीमासमेत गराइसकेको उनले जानकारी दिए ।

गाउँमा पाल्न दिएका भैँसी ब्याएपछि पालेबापत केही रकम दिएर पुनःफार्ममा फर्काएर ल्याउने गरेको उनको भनाइ छ । जिल्लाको नवलपुर–मलङ्गवा सडकखण्डअन्तर्गत पर्ने त्यस क्षेत्रको सुप्रसिद्ध चमेली माईको मन्दिर नजिक सडक छेउको आठ कट्ठा जग्गामा सञ्चालन भइरहेको उक्त कृषि फार्ममा पालिएका भैँसीको आहाराका लागि करीब साढे तीन बिघा जग्गा भाडामा लिएर घाँससमेत रोपेको उनले बताए ।

प्रत्येक दिन एउटा भैँसीका लागि करीब ५० किलो आहाराको आवश्यकता पर्ने गरेको उनले जानकारी दिए । यसका लागि प्रतिभैँसी ३० किलो सुख्खा भुस, १५ किलो हरियो घाँस र पाँच किलो दाना मिसाएर खाना तयार पारिन्छ ।

फार्मबाट दैनिक २०० लिटर दूध उत्पादन हुने गरेको छ । कृषक यादवले कृषि फार्ममा उत्पादन भएको दूध बजारसम्म पु¥याउनका लागि फार्मसँगै डेरी पनि खोलेका छन् । उक्त डेरीमा आसपासका स्थानीय किसानले उत्पादन गरेको दूधसमेत सङ्कलन गरी दैनिक करीब ५०० लिटरभन्दा बढी दूध जिल्ला सदरमुकाम मलङ्गवालगायतका ठूला बजारमा पठाउने गरिएको छ । तर अझै पनि बजारको मागअनुसार दुध पु¥याउन नसकिएको उनले जानकारी दिए ।

उनले कृषि फार्ममा दुई जना स्थानीयलाई रोजगारीसमेत दिएका छन् । उनले अझै भैँसी थप्ने योजना रहेकोसमेत बताए । एक वर्ष पहिले करीब २५ लाख ऋण लिएर शुरु गरेको व्यवसाय अहिले करीब एक करोड २५ लाख बराबरको पुगिसकेको छ । दूध बिक्रीबाट राम्रो आम्दानी भइरहेकाले कृषि पेशाबाट आफू पूर्ण सन्तुष्ट रहेको यादवले बताए । युवाशक्ति सबै विदेश जाने क्रम चलिरहेका बेला उहाँ भने यस क्षेत्रका युवाका बीच गतिलो उदाहरण बनेका छन् ।

पढेलेखेका युवालाई जागिर नपाएर वैदेशिक रोजगारीमा जानूभन्दा आफ्नै देशको भूमिमा रहेर कृषि क्षेत्रमा लाग्न उनी सुझाउँछन् । कृषिमा पशुपालन मात्र नभई व्यावसायिक तरकारी तथा फलफूल खेती, मत्स्यपालन, पोल्ट्री फार्म तथा कृषिसम्बन्धी अन्य विभिन्न क्षेत्रमा राम्रो सम्भावना रहेकाले आफूले गर्नसक्ने कुनै पनि एउटा व्यावसाय छनोट गरी त्यससम्बन्धी तालीम लिई दक्षता हासिल गरेर अगाडि बढ्न उनले युवालाई सुझाव दिएका छन् ।

कृषि व्यावसाय सञ्चालन गर्न सरकारले किसानलाई सहुलियत व्याजदरमा ऋण उपलब्ध गराउँदै आएको छ । बेलाबेलामा अनुदान दिने र ऋणको ब्याजमा समेत सहुलियत दिने गरेकाले कृषि पेशा अरु पेशाभन्दा सुरक्षित रहेको कृषक यादवको भनाइ छ ।