एघार हजार भोल्टको विद्युत् सट हुँदा घर र गोठमा क्षति

पूर्वी चितवनको रत्ननगरमा ११ हजार भोल्टको विद्युत् तार सट हुँदा घर र गोठमा क्षति पुगेको छ । रत्ननगर नगरपालिका–१६ शिवालय टोलका डिल्ली भुजेलको घर र गोठमा क्षति पुगेको हो ।

Advertisement

इलाका प्रहरी कार्यालय टाँडीका अनुसार विद्युत् सट हुँदा भुजेलको गोठमा रहेको एउटा गाईको बाच्छी र बाख्रो मरेका छन् । दुईवटा बाख्रा र एउटा बच्छी घाइते भएको कार्यालयले जनाएको छ । कार्यालयका प्रहरी निरीक्षक प्रकाश शाहका अनुसार भुजेल सामान्य घाइते हुनुभएको र उहाँलाई उपचारका लागि अस्पताल पठाइएको छ । थप विवरण आउन बाँकी रहेको उहाँले जानकारी दिनुभयो ।

नेपाल विद्युत् प्राधिकरण वितरण केन्द्र टाँडीका प्रमुख नवीन लाभका अनुसार विद्युत् तारलाई पोलबीचमा छुट्याउने पिन इन्सुलेटरबाट तार चुँडियर भुइँमा झर्दा विद्युत् सट भएको हो । ओसिलो भुइँमा विद्युतीय तारले छुँदा गोठमा करेन्ट लागेको उहाँले जानकारी दिनुभयो । उक्त घरगोठ नजिकैबाट हाइटेन्सन लाइन लगिएको छ । घटनापछि अहिले मर्मतको काम सुरु भएको लाभले बताउनुभयो ।

दुई सय किसानलाई गाई बाँड्ने अभियान सुरु

पूर्वी चितवनको रत्ननगर नगरपालिकाले २०० कृषकलाई अनुदानमा गाई बाँड्ने कार्यक्रम आजदेखि सुरु गरेको छ । पहिलो दिन १६ जना किसानलाई एक÷एक वटाका दरले अनुदानमा गाई वितरण गरिएको हो । पशुपालनमार्फत गरिबी न्यूनीकरण गर्ने उद्देश्यले ५० प्रतिशत अनुदानमा गाई वितरण गरिएको हो । गाई वितरणका लागि नगरपालिकाको नवौँ नगरसभाले रु एक करोड विनियोजन गरेको थियो । नगरपालिकाको रु एक करोड र किसानको रु एक करोड गरी दुई करोडको लगानीमा २०० वटा दुधालु गाई वितरण गर्ने योजना रहेको छ ।

नगरपालिकाले गाईसँगै गोठ सुधारका लागि रु १० हजार प्रदान गरेको छ । नगरपालिकाले प्रदान गरेको रु १० हजारमा किसानले रु १० हजार थप गरी रु २० हजारमा गोठ मर्मतको काम गर्नुपर्छ । किसानले कम्तीमा रु ८० हजार मूल्य बराबरको गाई खरिद गर्नुपर्ने हुन्छ । बिहान बेलुका गरी कम्तीमा १० लिटर दूध दिने र गाई पूर्णरूपमा स्वस्थ्य हुनुपर्ने पशु विकास अधिकृत शालिग्राम पौडेलले बताउनुभयो ।

नगरपालिकाले किसानको आर्थिक अवस्था मूल्याङ्कन गरी पशुपालनबाटै जीविका चलाउँछु भन्ने विश्वास भएका किसानलाई मात्र गाई वितरण गर्ने उहाँले जानकारी दिनुभयो । नगरपालिका प्रमुख नारायण वन र उपप्रमुख विमला दुवाडीले नगरपालिका परिसरमा किसानलाई गाई हस्तान्तरण गर्नुभएको हो । अनुदानमा गाई पाएपछि किसान उत्साहित भएका छन् ।

नगर प्रमुख वनले सुत्केरी पशुलाई भत्तापछि किसानलाई उद्यमी बनाउन गाई वितरण गरिएको बताउनुभयो । विदेशबाट फर्किएर स्वदेशमै केही गर्न इच्छुक युवा र आर्थिक अभावका कारण पशुपालन गर्न नसकेका गरिब किसानको पहिचान गरी गाई वितरण गरिएको उहाँको भनाइ थियो । उपप्रमुख दुवाडीले नगरको गौरवको योजनाअन्तर्गत किसानलाई गाई वितरण सुरु गरिएको बताउनुभयो ।