अग्रज पत्रकार खड्काको निधन
बागलुङ: बागलुङका अग्रज पत्रकार विदुर खड्काको ८० वर्षको उमेरमा निधन भएको छ ।
Advertisement
मिर्गौला रोगबाट ग्रसित उनको काठमाडौंमा उपचारका क्रममा आज बिहान निधन भएको पुँवार खड्का समाज बागलुङका उपाध्यक्ष लीलादेवी खड्काले जानकारी दिइन् ।
दिवङ्गत खड्काको बिहीबार गृहजिल्लामै अन्त्येष्टि गरिने भएको छ । उनको पहलमा विसं २०२८ मा बागलुङबाट ‘धौलाश्री’ साप्ताहिक प्रकाशनमा आएको थियो । खड्का त्यसको सम्पादक थिए ।
विसं २०५८ मा दैनिक रुपमा प्रकाशन हुन थालेको उक्त पत्रिका विसं २०६३ मा बन्द भएपनि त्यसको अनलाइन संस्करणले निरन्तरता पाउँदै आएको थियो ।
खड्काले विसं २०५७ मा गठित नेपाल पत्रकार महासंघको तत्कालीन धवलागिरी शाखाको संयोजक भएर काम गर्नुभएको थियो ।
उनका तीन छोरा छन् । खड्काकी श्रीमती गङ्गाको पनि निधन भइसकेको छ । खड्काले दिवङ्गत आमा सुमित्रा र श्रीमती गङ्गाको स्मृतिमा ‘सुगङ्गा पुरस्कार’समेत स्थापना गरेका थिए ।
प्रतिकृया दिनुहोस्